અમદાવાદઃ શહેરના સરખેજ વિસ્તારમાં ફિલ્મ જેવી હચમચાવી નાખે તેવી ઘટના સામે આવી છે. અહીં એક સ્ત્રીએ પોતાના પ્રેમી સાથે મળી પતિની હત્યા કરી તેની લાશ ઘરના રસોડામાં જ દાટી દીધી હતી. આશરે એક વર્ષ પહેલાં પતિ ગુમ થયાની ફરિયાદ નોંધાઈ હતી, પરંતુ ક્રાઇમ બ્રાન્ચે તપાસ હાથ ધરીને આ ચોંકાવનારો ભેદ ઉકેલી કાઢ્યો.
સરખેજના ફતેવાડી કેનાલ રોડ વિસ્તારમાં રહેતા સમીર બિહારી નામના યુવકના ગુમ થવાના કેસમાં પોલીસે ખાનગી વોચ બાદ તેની પત્નીના પ્રેમસંબંધની માહિતી મેળવી હતી. પૂછપરછ દરમિયાન પત્નીએ સ્વીકાર્યું કે દોઢેક વર્ષ પહેલાં તેણે પોતાના પ્રેમી સાથે મળી પતિની હત્યા કરી લાશ રસોડાની જમીનમાં દાટીને મીઠું નાખીને ત્યાં ચણતર કરાવી દીધું હતું. બાદમાં તેણે ઘર પણ બદલી નાખ્યું હતું.
પોલીસે ખોદકામ કરતાં રસોડામાંથી માનવ હાડપિંજર મળી આવ્યું હતું. પતિ ગુમ થયાની ફરિયાદ કરનારી પત્ની અને તેનો પ્રેમી જ હત્યારા નીકળતાં સમગ્ર વિસ્તારમાં ચકચાર મચી ગઈ છે.
