ગાંધીનગરઃ રાજ્યમાં કમોસમી માવઠાથી પાકને ભારે નુકસાન સહન કરનાર ખેડૂતો માટે ગુજરાત સરકારે ઐતિહાસિક રાહત પેકેજ જાહેર કરવાની તૈયારી કરી છે. સૂત્રોના જણાવ્યા મુજબ આ પેકેજનું કદ અત્યાર સુધીના તમામ રાહત પેકેજોમાં સૌથી મોટું હશે અને તેની સત્તાવાર જાહેરાત આજે સાંજે પ્રેસ કોન્ફરન્સ મારફતે થઈ શકે છે.
મુખ્ય પ્રધાન ભૂપેન્દ્ર પટેલની અધ્યક્ષતામાં ગઈકાલે લાંબી ચર્ચા બાદ આ પેકેજને આખરી સ્વરૂપ આપવામાં આવ્યું હતું. આ જાહેરાત બાદ લાખો ખેડૂતોને પાક નુકસાનની વળતર સહાયરૂપે મોટી રાહત મળશે અને તેમના ખાતામાં સહાયની રકમ ઝડપથી જમા થાય તે માટેની પ્રક્રિયા યુદ્ધના ધોરણે હાથ ધરાશે.
સૂત્રોના જણાવ્યા પ્રમાણે એસડીઆરએફના ધોરણ મુજબ આ પેકેજનું કદ રૂ. 1700થી 2000 કરોડ સુધી હોઈ શકે છે, પરંતુ રાજ્ય સરકાર પોતાના ફાળાના ઉમેરાથી તેને લગભગ રૂ. 6000 કરોડ સુધી લઈ જઈ શકે છે. રાજ્યના 249 તાલુકાઓમાં 16,000થી વધુ ગામોમાં પાકને નુકસાન થયું હોવાનું અંદાજ છે, જેમાંથી આશરે 70 ટકા વિસ્તારોમાં સર્વેક્ષણનું કામ પૂર્ણ થઈ ગયું છે.
