સંસદના શિયાળુ સત્ર દરમિયાન લોકસભામાં ચૂંટણી સુધારા પર ગરમાગરમ ચર્ચા થઈ, જેમાં સ્પેશિયલ ઇન્ટેન્સિવ રિવિઝન (SIR) થી લઈને EVMની વિશ્વસનીયતા અને રાજકીય ફંડિંગ જેવા મુદ્દાઓ કેન્દ્રમાં રહ્યા. કોંગ્રેસ સાંસદ મનીષ તિવારીએ ચર્ચાની શરૂઆત કરતા ચૂંટણી પંચની નિષ્પક્ષતા અને હાલની પ્રક્રિયાઓ પર ગંભીર સવાલો ઉઠાવ્યા.
તિવારીએ દાવો કર્યો કે ચૂંટણી પંચ પાસે કાયદાકીય રીતે SIR કરાવવાનો અધિકાર જ નથી, કારણ કે બંધારણ કે પ્રસ્તુત કાયદાઓમાં SIR માટે કોઇ સીધી જોગવાઈ નથી. તેમના જણાવ્યા અનુસાર, મતદાર યાદીમાં વિસંગતતા હોય તો એના સ્પષ્ટ કારણો દર્શાવીને જ સુધારણા થઈ શકે, પરંતુ દેશમાં અનેક જગ્યાએ SIRનો દુરુપયોગ થઈ રહ્યો છે.
તેમણે આ સાથે ચૂંટણી પંચની નિયુક્તિ પ્રક્રિયામાં બદલાવની માંગણી કરી, જેમાં સરકાર તથા વિપક્ષના સભ્યો સાથે CJIનો પણ સમાવેશ કરવાની જરૂરિયાત વ્યક્ત કરી. સ્પીકર ઓમ બિરલાએ આ ચર્ચાને સંવેદનશીલ ગણાવી તમામ સભ્યોને આરોપ-પ્રત્યારોપ ટાળીને ચૂંટણી સુધારા પર કેન્દ્રિત રહેવાની ચેતવણી આપી.
