ઇન્ડિગો એરલાઈન્સમાં પાયલટની ગંભીર અછત વચ્ચે DGCAએ મોટા પગલાં લેતાં ચાર ફ્લાઇટ ઓપરેશન્સ ઇન્સ્પેક્ટરને સસ્પેન્ડ કર્યા છે. આ અધિકારીઓ ઇન્ડિગો માટે ‘પ્રિન્સિપલ ઓપરેશન્સ ઇન્સ્પેક્ટર’ તરીકે કાર્યરત હતા અને એરલાઇનના સંસાધનો, પાયલટની ઉપલબ્ધતા તેમજ સુરક્ષા દેખરેખ માટે જવાબદાર હતા. તપાસમાં દેખરેખમાં બેદરકારી સામે આવી હોવાના કારણે તેમની સામે કાર્યવાહી કરવામાં આવી છે.
નવા FDTL નિયમો લાગુ થવાના હતા છતાં ઇન્ડિગોએ પાયલટની પૂરતી ભરતી ન કરવાથી સંકટ ઊભું થયું હતું. પરિણામે DGCAને Airbus A320 માટે નવા નિયમોનો અમલ 10 ફેબ્રુઆરી 2026 સુધી મુલતવી રાખવો પડ્યો.
ઇન્ડિગોના પાયલટ્સ અને મેનેજમેન્ટ વચ્ચે વધતી અસહમતિ, પગાર મુદ્દા, નાઇટ લેન્ડિંગ પેમેન્ટ વિવાદ અને મેડિકલ રજા નીતિના ફેરફારોને કારણે તણાવ વધુ વધી રહ્યો છે. DGCAએ એરલાઇનને પાયલટની ભરતી ઝડપી કરવાની સૂચના આપી છે, જ્યારે ઇન્ડિગો પાયલટની અછત હોવાનો દાવો નકારી રહી છે.
