સોમવારે વહેલી સવારે અફઘાનિસ્તાનના ઉત્તર ભાગમાં 6.3 તીવ્રતાનો ભૂકંપ અનુભવાયો, જેનું કેન્દ્ર મઝાર-એ-શરીફ નજીક ખોલ્મમાં જમીન સપાટીથી 28 કિમી ઊંડાઈએ હતું. આ ભૂકંપના આંચકા કાબુલ સહિત પડોશી દેશો તાજિકિસ્તાન, ઉઝબેકિસ્તાન અને તુર્કમેનિસ્તાનમાં પણ અનુભવાયા. મઝાર-એ-શરીફના વસ્તીવાળા વિસ્તારમાં લોકો ડરથી ઘરોમાંથી દોડી આવ્યા અને રસ્તાઓ પર ભયભીત થઈ ગયા. પ્રાથમિક અહેવાલો મુજબ, મોટી સંખ્યામાં જાનહાનિ થઇ હોવાની આશંકા વ્યક્ત કરવામાં આવી છે. થોડા મહિના પહેલા પૂર્વીય અફઘાનિસ્તાનમાં આવેલા વિનાશક ભૂકંપમાં 2200થી વધુ લોકોના મોત થયા હતા.
