દૂધ ઉદ્યોગમાં ગુજરાતની અમૂલએ નવી સિદ્ધિ હાંસલ કરી છે. ઇન્ટરનેશનલ કોઓપરેટિવ એલાયન્સ (ICA) વર્લ્ડ કોઓપરેટિવ મોનિટર 2025ના અહેવાલ મુજબ, ગુજરાત કોઓપરેટિવ મિલ્ક માર્કેટિંગ ફેડરેશન લિમિટેડ (GCMMF – અમૂલ)ને માથાદીઠ જીડીપી આધારિત વિશ્વની નંબર 1 સહકારી સંસ્થા તરીકે માન્યતા મળી છે. અમૂલે ઈફ્કોને પછાડી પ્રથમ સ્થાન મેળવ્યું છે.
મુખ્ય પ્રધાન ભૂપેન્દ્ર પટેલે સોશિયલ મીડિયા પર અભિનંદન પાઠવતાં જણાવ્યું કે, “અમૂલ ભારતનું ગૌરવ છે; ગુણવત્તા, નવીનતા અને સહકારના મૂલ્યો દ્વારા તેણે લાખો ખેડૂતોને સશક્ત બનાવ્યા છે.”
અમૂલના એમડી જયેન મહેતાએ જણાવ્યું કે અમૂલ શહેરો જ નહીં પરંતુ ગ્રામ્ય વિસ્તારોમાં પણ લોકપ્રિય છે, જ્યારે ડૉ. વર્ગીસ કુરિયનના દ્રષ્ટિકોણથી રચાયેલ GCMMF આજે 36 લાખથી વધુ ખેડૂતોને જોડતું વિશ્વનું સૌથી મોટું ડેરી નેટવર્ક બની ચૂક્યું છે.
