અમદાવાદના નિકોલ વિસ્તારમાં એક ચોંકાવનારી ઘટના બની છે, જ્યાં પતિએ જાહેરમાં જ પત્નીને છરીના ઘા મારતા લોકો ભયભીત થઈ ગયા. આખી ઘટના સીસીટીવીમાં કેદ થઈ છે.
પતિએ રોડ પર પત્નીના વાળ પકડીને ઢસડ્યા બાદ ગળા અને શરીર પર વારંવાર છરીના ઘા ઝીંક્યા, જોકે લોકો વચ્ચે પડી ગયા છતાં હુમલો અટક્યો નહોતો.
પીડિત મહિલા હાલ અસારવા સિવિલ હોસ્પિટલમાં સારવાર હેઠળ છે, જ્યાં ડોક્ટરોએ ગળા અને ખભા પર 75 ટાંકા લીધા છે.
માહિતી મુજબ, દોઢ વર્ષ પહેલાં બંનેએ પ્રેમલગ્ન કર્યા હતાં, પરંતુ સાસરિયા પક્ષના માનસિક અને શારીરિક ત્રાસને કારણે મહિલા છેલ્લા ચાર મહિનાથી પિયરમાં રહેવા ગઈ હતી.
યુવતીએ અગાઉ પણ પતિ સામે ફરિયાદો નોંધાવી હતી. તેણે જણાવ્યું કે પતિ છૂટાછેડા માંગતો હતો, પરંતુ તેણે ઇનકાર કરતાં આ પ્રાણઘાતક હુમલો થયો હતો.
પોલીસે આરોપીની ધરપકડ કરી છે અને વધુ તપાસ શરૂ કરી છે.
