ઓક્ટોબરના અંતિમ સપ્તાહમાં પડેલા કમોસમી વરસાદથી ગુજરાતના ૨૪૯ તાલુકાના ૧૬,૦૦૦ ગામોમાં પાકને ભારે નુકસાન થયું છે. પ્રાથમિક આંકડા મુજબ ખેતીપાકને રૂ. ૫,૦૦૦ કરોડથી વધુનું નુકસાન થવાની શક્યતા છે. રાજ્ય સરકારે અસરગ્રસ્ત ખેડૂતોને વળતર આપવા માટે કેન્દ્ર સરકારને વિશેષ સહાય પેકેજની માંગ કરી છે. સુરત, ભરૂચ, વલસાડ, વડોદરા અને ભાવનગર સહિત અનેક જિલ્લાઓમાં ડાંગર, સોયાબીન, મકાઈ અને શાકભાજીના પાકને ભારે ફટકો પડ્યો છે. મુખ્યપ્રધાનની અધ્યક્ષતામાં યોજાયેલી ઉચ્ચસ્તરીય બેઠકમાં નુકસાનના આકારણી અને વળતર પેકેજ અંગે ચર્ચા કરવામાં આવી હતી.
