મુંબઈમાં પાણીના સંરક્ષણ અને દરિયાઈ પ્રદૂષણ ઘટાડવા BMC દ્વારા હાથ ધરાયેલ સ્યુએજ ટનલ પ્રોજેક્ટને મોટો વેગ મળ્યો છે. ધારાવીથી ઘાટકોપર સુધી બાંધવામાં આવનાર 8.5 કિમી લાંબી સ્યુએજ ટનલને કોસ્ટલ રેગ્યુલેશન ઝોન (CRZ) તરફથી મંજૂરી મળી ગઈ છે, જેના કારણે પ્રોજેક્ટના સૌથી મોટા અવરોધોમાંથી એક દૂર થયો છે.
મહાનગરપાલિકા શહેરમાં કુલ સાત આધુનિક સ્યુએજ ટ્રીટમેન્ટ પ્લાન્ટ ઉભા કરી રહી છે, જે મળીને દરરોજ 2,464 મિલિયન લિટર પાણી પર પ્રક્રિયા કરશે. પ્રક્રિયા કરાયેલ પાણી ભાંડુપ વોટર ફિલ્ટરેશન પ્લાન્ટ સુધી પહોંચાડવા માટે બે તબક્કામાં ટનલ બાંધવામાં આવશે. પ્રથમ તબક્કામાં ધારાવી–ઘાટકોપર ટનલ અને બીજા તબક્કામાં ઘાટકોપર–ભાંડુપ સુધીની 11 કિમી વોટર ટનલનો સમાવેશ થાય છે.
આ પ્લાન્ટો શરૂ થયા બાદ 1,232 મિલિયન લિટર પાણી પુનઃઉપયોગ માટે ઉપલબ્ધ બનશે, જ્યારે બાકી પાણી પર બીજી સ્તરની પ્રક્રિયા કર્યા પછી દરિયામાં છોડવામાં આવશે, જેના કારણે દરિયાઈ પાણીની ગુણવત્તામાં નોંધપાત્ર સુધારો થશે.
