ગુજરાતમાં સ્થાનિક સ્વરાજ્યની ચૂંટણીઓ નજીક આવતા જ ભાજપના પ્રદેશ કાર્યાલય ‘કમલમ’માં રાજકીય ચહલપહલ વધતી જોવા મળી રહી છે. પાર્ટી સંગઠનની રચના સાથે સાથે રાજ્યના વિવિધ બોર્ડ અને નિગમોમાં ખાલી પડેલા ચેરમેન તથા ડિરેક્ટરના પદો પર ટૂંક સમયમાં નિમણૂકો થવાની શક્યતા વ્યક્ત થઈ રહી છે. બોર્ડ-નિગમોમાં મળતા હોદ્દા, કાર અને બંગલાના લોભે દાવેદારોમાં લોબિંગ તેજ બની ગયું છે. હાઈકમાન્ડ તરફથી સંગઠનાત્મક નિમણૂકોને લીલી ઝંડી મળી હોવાનું મનાય છે અને દિલ્હીમાં યોજાયેલી બેઠકો બાદ હવે માત્ર ઔપચારિક જાહેરાત બાકી હોવાનું રાજકીય વર્તુળોમાં ચર્ચાઈ રહ્યું છે.
