યુક્રેનના ઓડેસા બંદર પર શનિવારે થયેલા હુમલામાં MV AGN Ragnar નામનું વેપારી જહાજ નિશાન બન્યું હતું. આ જહાજમાં ચાર ભારતીય નાગરિકો ક્રૂ સભ્ય તરીકે કાર્યરત હતા. ભારતીય દૂતાવાસે માહિતી આપી છે કે ચારમાંથી બે ભારતીયો સંપૂર્ણપણે સુરક્ષિત છે, જ્યારે અન્ય બેની સ્થિતિ અંગે હજુ સુધી સત્તાવાર માહિતી મળી નથી.
ભારતીય દૂતાવાસ સતત પરિસ્થિતિ પર નજર રાખી રહ્યું છે અને સ્થાનિક સત્તાવાળાઓ તથા જહાજ સંચાલકો સાથે સંપર્કમાં છે. રશિયા-યુક્રેન યુદ્ધ શરૂ થયા બાદ કાળા સમુદ્ર કિનારે આવેલું ઓડેસા બંદર વારંવાર હુમલાનો ભોગ બનતું રહ્યું છે. આ ઘટનાને પગલે ભારતીય નાગરિકોની સુરક્ષા અંગે ચિંતા વ્યક્ત કરવામાં આવી છે અને તેમના અંગે વધુ માહિતીની આતુરતાપૂર્વક રાહ જોવામાં આવી રહી છે.
