કેરળમાં યોજાયેલી સ્થાનિક સ્વરાજ્ય સંસ્થાઓની ચૂંટણીના પરિણામો માત્ર પંચાયત અને વોર્ડની જીત-હાર પૂરતા સીમિત નથી રહ્યા, પરંતુ રાજ્યના રાજકારણમાં મોટો ફેરફાર સૂચવતા સંકેતો આપી રહ્યા છે. જ્યાં લેફ્ટ ડેમોક્રેટિક ફ્રન્ટ (LDF) પોતાનો પરંપરાગત પ્રભાવ જાળવી રાખવામાં સફળ રહી છે અને કોંગ્રેસની આગેવાની હેઠળની UDF પણ મજબૂત દેખાઈ છે, ત્યાં ભાજપ માટે આ ચૂંટણી ‘બ્રેકથ્રુ’ તરીકે જોવામાં આવી રહી છે.
એર્નાકુલમ જિલ્લાના મુનંબમ વિસ્તારમાં NDAની જીતને ભાજપે ઐતિહાસિક રાજકીય વળાંક ગણાવ્યો છે. ભાજપના કેરળ મહાસચિવ અનૂપ એન્ટની જોસેફના જણાવ્યા મુજબ, આ જીત પાછળ મુનંબમ વક્ફ વિવાદ મુખ્ય મુદ્દો રહ્યો. તેમનો દાવો છે કે વક્ફ બોર્ડના કથિત દાવાઓના કારણે લગભગ 500 ખ્રિસ્તી પરિવારો પોતાના ઘર ગુમાવવાની કગાર પર હતા.
ભાજપનો આરોપ છે કે LDF અને કોંગ્રેસ બંનેએ આ મુદ્દે લાંબા સમય સુધી મૌન જાળવી રાખ્યું, જ્યારે મોદી સરકાર અને ભાજપે અસરગ્રસ્ત પરિવારોની બાજુએ ઊભા રહી તેમને ન્યાય માટે અવાજ આપ્યો. પરિણામે, સ્થાનિક લોકોમાં અસંતોષ ભાજપ તરફ વળ્યો અને મતદાનમાં તેનો સીધો લાભ મળ્યો.
સાત દાયકા જૂના વક્ફ વિવાદે હવે ચૂંટણી રાજકારણમાં જોરદાર એન્ટ્રી કરી છે. આ જીતથી ભાજપને કેરળમાં પોતાની રાજકીય હાજરી મજબૂત કરવાની તક મળી છે અને 2026ની વિધાનસભા ચૂંટણી પહેલા તેને મહત્વપૂર્ણ સંકેત માનવામાં આવી રહ્યો છે.
